Kahinumdom pa ba ka sa mga panahon nga puno kaayo ta og mga reklamo kay gatapun-og na ang atong mga buluhaton, gabukid sa kadaghan sama sa bukid sa Pangasugan? Sa kadtong mga niaging panahon nga dili gayud ta mahutdan og mga yangungu kay motukar man gayud ning katapulan nga anaa kanato. Pero kinsa man sad ang dili kapuyon nga libo-libong lab reports,homeworks, activities, ug mga tun-anan man sad ang anaa sa atong kiliran. Makaingon, na lang ta, “Hays, kapoy na. Kanus-a paman ni mahuman ning pagkswela?”Apan, dili gayud ikalimod nga gahandom ta atong mga panahona.
Gimingaw naku sa Visca!
Karon, ang buntag nato, udto na. Wala na gani ta kahibaw kung unsa nang orasa. “Toot, toot, toot”, asa naman tong chimes sa Visca. Unsa namang orasa? Ubanan pa gayud sa init nga panahon nato karon. Makapangita na lang ta sa gaice-ice nga tubig sa Visca nga arang bugnawa, sama sa pagtagad sa atong crush dinhi sa atoa. Pero aysa, kalimot ko, panagsa raman diay ta maligo kay kandingon baya tang daku! Apan, usa sa mga butang nga ikaproud nato, confident gihapon ta mosulod sa klase bisan walay ligo, magpayong-payong pa magbaktas sa VSU Mall bisan ang mga nawong puno na kaayo og mga singot. Aleast, bisan walay ligo, naa gihapoy sulod ang utok, hanas gud mangmating og payong.
“Asa na kaha tong akong payong?”
Usa sa mga rason nganung kita magbagutbot – tungod sa nawa nga payong, labyan pa gayud ta sa mga sweet nga couples nga gashare og payong. Unsaon taman lagi ning single raman ta, kawatan pa gayud og payong. Unta iuli na! Nagkadugay, nagkadaghan na ning mga couples sa Visca, halos tanang suok-suok, gioccupy na nila. Eco-Park, Lagoon, Molave Hill, Temptation Island ug Beach - mga lugar nga kanunay saksi sa mga gihulmigas nga panagkuyog nila. Sakto na masuya man lang sad ta. Pero aysa, Tempation Island? Mura og ubay-ubay ta og maestorya anang lugara. Makamingaw gayud ning mga kaboang sa atong barkada!
“Asa naman ka, Temptation Island ta unya?”
Linya nga puno og mga nagkandaiya-yang estorya nga karon atong gipangita ug gihandom. Hinaot na mabalik tong ing-ato na mga panahon. Presko pa sa atong huna-huna ang mga drama sa atong mga barkada - ang mga kasakit nila sa ilang gugma, ang mga kwatro ug singko nga grado na ilang nakuha, ug ang mga problema nilang nanginahanglan og tambag, tambag gikan sa usa ka barkada nga nanginahanglang pud og tambag. Ubanan pa gayud sa mga ilimnon nga color ‘roygbiv’ ug mga junkfoods nga gihimo og panihapon nga ang kusog pa gayud mukaon ang mga wala nibayad, pero sige na lang kay barkada man. Kini gayung Temptation Island, temptation gayud! Medyo improper man paminawon, pero atleast nakagawas ta sa atong stress gumikan sa atong gradong makadepress.
“Tihika man mohatag og grado ni Sir, arang ka-Tres!”
Sakit man huna-hunaon ang Tres pero naa gayud pud tay mga instructors nga walay duha-duhang mohatag og grado nga mas sakit pa sa Tres. Kwatro, Singko, Aray! Kasakit sa kasingkasing ug Dughan. Gamay na lamang gayud, iya nang i-says. Dungagan pa gayud sa mga exams nga makaliki og utok, makabali og liog ug makaboang sa kalisod. Aguy, kaloy-i sad mi Maam ug Sir, mingawon raman pud mo namo puhon mograduate mi. Pagraduate-ta lang sad pud tawn mi. Apan, grabe gayud ang sakit sa gradong ubos pa sa tres! Nuot sa panit, miduot sa unod padung sa bukog.
“Sige, mobawi na lang mi!”
Mga magarbosong pulong nga kanunay natong ilitok kung kita mahagbong. Apan, sayon raman unta pero nganung lisod man pagabuhaton. Kung makahigayon man gali ta og tuon, mata sad nato padulong na mopiyong – ang resulta, postponed ang pagtuon, ugma na sad puhon! Sanglit daghan kaayong ugma – ugma, sunod ugma, sunod-sunod ugma. Aguy, wala gayuy pagtuon nga mahitabo ani karon. Magbasol na sad ta ani kung magsunod-sunod atong mga hagbong. Apan, bisan pa og mahimutang ta sa arang kasubo nga sitwasyon, abot gihapon sa dalunggan ang atong mga ngisi ubanan pa sa atong mga katawa nga kusog pa sa talugdog sa langit. Nawong nato ara lang gayung katingsi. Busa, makalimtan gayud nato ang atong mga siluran kung magkatapun-og na sad ning atong mga amigo og amigang puno og kaboang. Nagkadaiya-iya man tuod ang atong pamatasan, pero magkahiusa gayud ta basta pagkiat na ang hisgutan.
“Ganahan naku mobalik. Akong presensya gitawag na adto sa Visca.”
Tana! Mobalik nata! Ang atong paghandom sa atong pinalanggang Visca, dili gayud masukod. Walay makakompra sa kasakit og kalipay, kaguol og kahayay nga atong naambit sa pagpuyo ug pagskwela. Gabukid man ang atong mga reklamo mahitungod sa atong kahago, sanglit, magpangita gayud ta sa mga kasinatian nga sa Visca lang nato makab-ot. Ang mga samyo nga mitatak sa atong mga dughan nga kanunay natong gipangita bisan asa man kita maabot. Busa tana!
Andam na ba? Andam na ba ang mga dakung bagtak mobaktas sa Visca? Kay dungan natong patuyangan og tagbawon ang atong kamingaw nga atong gidala-dala. Tana, mamalik nata!